ai 4 y 5 de auril 09

L fova udù datn de fé la jita te 2 dis, cun n deslivel de 600 m l prim y 1.200 m l segondo dì.

Ajache la temperatures ti ultimi dis se ova bendebo auzà, iese per rejon de segureza bel piei via dadumna, y nia domesdì, coche l fova stat udù danora, per rue pra hutia nchina che la condizions dla neif fova mo bones y l pericul de lievines pitl.

Son perchel piei via da la 5.45 da sëlva demez per furné cun 2 pulmini plens nchina a Langtaufers, plu avisa a Melag, it insom la Vinschgau.

Da ilò son muec ben presc de viers dla hutia Weißkugel a 2.542 m, che on arjont ntëur al 11. La decision de pie via daduman ie stata dreta, ajache on nsci abinà la condizions dla neif mo bona per ruè zenza gran fadies pra hutia. Nosta via passova avisa ulache 3 dis dant fova 3 persones ruvedes te na levina, y on pudú se render cont dla fertuna che chisc à abú che ne ie nia suzedú deplu. 

Do se avëi para la prima gran sëit ons giatá zech de bon da marenda, ntan che univa anjinieda ca nosta majon. L domesdì ons passa dedora a suredel, sla ciaculan, se studian ju i crëpes nteur via,  o cartan y n valguni de nëus à cumpensà la nuët curta la sëira dant jan a se poner per n valgun ëura. L temp fova bel y uni un de nëus se udova bel l dì so sun piza cun la medema bona condizions.
Ngali fovel merë la 6, che l òst cherdova a cëina, na cëina che ti á a duc dret plaju. Ntant  ie ënghe ruei do 3 autri, che ne ova nia pudù – per rejons de lëur – pie via bel daduman y cun 21 persones fans sen na bela cumpeida.
Do cëina sons muec te na pitla stua, ulache David y Raimund á sunà vel ciantia cu la chitarra y l ie unì ciantà y ciaculà mo n pez.

L dì do dadumna son levei abeneuera y da mesa la 6 nes aspitova bel n gustè cun de uni sort de bona roba, da dé forza per rué sun piza.

L temp fova bon, ënghe sce la piza fova tla nibels y duc se ncunfertova a ruvé sun piza. Do la proa dl piepser son muec niancano tan bel plan per ruè de bon ëura sun piza y do avisa 3 ëura passan per l Langtaufer Ferner y l Weißkugeljoch a 3.362 m ie i primes ruvei sainsom. L temp trajova mpue via y ca y vent se mudova ju cun suredl. Pra creusc fovel bendebo asniblà y purtruep ne ons nia pudù se goder l bel panorama y cialé de viers de nostra montes, che n veigh dala Weißkugel via. Perchel ne se l á ënghe nia uni un ududa da jì i ultimi 100 m via per l grat a pé nchin pra crëusc. 

Do avëi maià zech se á l temp mpue tra su y on nuzà la conidzions ideales per pie juvier. La condizions de nëif fova bones y les à cumpensà la fadia plu o manco granda che vel un á fat. Neif dura y tola se mudova ju, ma l fova per duc do la rata saurì a furné.
Per chiche ne ova mo nia fat fadia assé nes aspitova mo i ultimi 1000 m de planadura cun nëif dret mola, ualche on mo n iede messù to cà duta la forza per nes sburdlé nchin pra l post dai auti.

Dant sons mo tlamei pra hutia japé per fe na viva che dut à butà.

De gra a Phillip, Theo y Helmuth per nes avëi mená segures ntan chesta jita.