La piza dret cunesciuda y l bel temp á fat gola a chei de Gherdëina! L fova n gran nteress per chesta jita y bel l segondo dì fova duc i posc’ a disposizion plens.

Ala fin sons piei via do marenda cun 2 pulmini y n auto plen de viers de Alleghe a Pian de Pezzé (1.452 m), ulache on lascià i auti.

L prim dì ne fovel nia lonc da jì, perchel se á vel un o l auter lasciá mpue de dlaurela a pie su .

Da ilò sons piei su de viers de la furcela Coldai te n dre fiers, che vel un fajova ert a tre l flà. Ciche nes á judà fova savei che sainsom nes aspitova l lech de Coldai, ulache n pudova se  sferdé ju mpue. Vel un o lauter ti l á vagheda a fe it n saut tl lech; dinrer ciafieien a ste tan giut tl ega a sëura 2.000 m.

Per via dla bela sëira y dl bon ciaut ne ans nia gran prescia de ruvé pra pra l Rifugio Coldai (2.132 m), che fova me plu do l col ju, y ulache son stai seura nuet.

Tla utia ons maià dret bon, ma on abú n bel ejempel che l ie for mo uties che seuravif, enghe sce n ie dut auter che da ulei bon cula jënt. Sciot! Duc se ova ncunfertá sun na blota sëira de bona ueia!

N dumenia sons levei bel abeneura per schivé l gran ciaut y l ngrum de jënt che minan de ancunté. Sons muec de viers dla fereda Alleghesi per rué pona puech dan marenda sun piza dla Civetta a 3.220 m. L se trata de na fereda mesarmenter ria, ma longia! Duc se l á caveda dret ben y ora che neus fovel puecia jënt da ilò su, perchel ala dret butá.

Sun piza nes ons tenì n pez, ajache l fova nia freit y l temp fova segur. N se stufan nia de ti cialé ai 360° de crepes che n possa udëi da cassù.

Juvier sons jic per la normale, tlaman mo da na tel pitla utia, ajache dut ova finá chel da bever y se ncunfertova sun n bon pier.

Mpò mo feter longia iela pona mo stata daldò y ala fin muova plu la seit che la giames

Ajache l fova bel do la rata tert y i uemes y la fenans o la mamis ne aspitova nia a cësa cun la cëina sun mëisa, sons mo tlamei via a Corvara per na pizza. Da la 23 h fova duc a cësa. Vel un platá, vel auter mpue brujá.

Ma duc cuntenc de vester unic pea y che dut a butá

2 pulmini, 18 persones, 18 grifs, 4 mesa cordes n valgun pics y n valgun eisschrauben. Pronti per per via!

… la sada 12.45 da Sëlva demez per furné nchin a Kasern t’insom Arhntal. Do vester mo tlamei te ustaria y cuntrulà che duc ebe pea dut, sons piei it per l Windtal  y su nchin pra la utia Lenkjöchl a 2.590 m ulache son stai sëura nuet. Dan pie su mo tlamé tl „Heilig-Geist-Kirchlein“ per na preghiera che dut bute. Nchin che son piei via se ovel mpue ansiblà it y damez it al ënghe mpue pluet, ma uni un jiva cun si ritmo y do belau 1.000 m de deslivel y 2 – 2,5 h ova duc arjont la utia a sut.

Se on spartí su te 3 majons y metú a sut l guant. Nia giut ala durá che on giatà la cëina. Fam ans ntant duc giatà assé. Do avëi marciadà mpue cun Philipp, iel stat fat ora de pie via da la 6.15 daduman, ënghe savan che l temp essa nia tení giut do marenda.  

Ce bel a pudei levé che l ie bel lineus! Per chei che sun la uties dorm puech, bel a pudëi finalmenter levé!

L fova mpue da nibl, ma l semiova che l se trajessa su.  A pie via semiova che l temp uniassa mieur. L fova do la rata ciaut y l ciel scialdi brum.

Do 2 h pona se ons trat seura y grifs y fat 4 cordates per pie su per l dlacier. L ova nevet 3 dis dant y perchel fovel do la rata saurí a jì y puech dlacià. N udova via la piza , ma la nibles trajova for plu it y dl bel panorama se ons juà puech. Puech dan ruvé sun piza ons ancuntà mo do la rata ngrum de cordates che fova su da l autra pert y univa bel de reviers. I ova fat lerch sun piza.

Ruvei sainson la Dreiherrenspizte a 3.498 nteur la 11 se ova trat it n dre nibl, y n udova iust ciche suzedova 5 m dan un. L trajova enghe n vent stramb, che n ne pudova nia lascé seura zech che l ne julova nia demez. L fova perchel ënghe do la rata freit y ajache la pizes nteurvia pudans me se pensé, ne se ons ënghe nia tenì su giut.

Sen nes aspitova 1.900 m de deslivel juvier. Chei va pa ben plu tla giames! Japé la dlacier se ons mo fermà a maie ora de flucion, che seun piza ne se ans nia teut dre dlaurela, ma ne ulan nia se fermé giut, savan che l unissa a pluvei domesdì via. Son mo tlamei pra na pitla utia puech dan ruvé japé, ajache an duc na dreta seit y son ruvei pra i pulmini ntuer mesa la 5 y puech do al scumencià a pluei.

Duc ie ruvei sun piza y duc inò san y nton pra auto. Enghe sce cul temp ne ala nia tan butà, rati ben che chei che fova pea, ti à mpò sapú bel.

De gra duc chei che a judà a menè y a meter a jì dut y de gra a duc chei che ie unic pea.

Ala proscima, plu bela!

Julia

n valguna „impressions“ dla festa sun resciesa ai 2 de lugio

L’instà ie dan la porta y nscì fovl inò ëura per l curs de jì a crëp!

N juebia sëira, ai 02.06.2011 nes ons – i 7 partezipanc – ancuntà cun i Mëinacrëp Flavio y Lucas tl local di Mëinacrëp a Urtijëi, ulache i nes à cuntà cie che toca dut tl flucion canche n va a crëp. Daldò ons pona ënghe pudù nes tré sëura l imbrago y purvé a fé nstëssa i gropes de basa che n adrova. Vel un à monc purvà a se “abseilen”…

La sada nes ons pona ancuntà dala 8 per furné sun l Jëuf de Sela. On spartì su la cordates y l material y po son bel snel muec de viëres dl Prim Ciampanil dl Sela. Dan jì permez ala via iel pona for de mpurtanza cialé tl liber ulache la via va… y dan pie su per la via à mo vel un pudù purvé a bater ite n ciodo.

Nscila sons muec bel debota ma for metan averda y cun Flavio o Lukas daujin, ajache l se stlujova for plu y plu ite… Sun piza on po mo maià l panino, ma l fova ëura de pie ju, che n sentiva bel la prima gótes. La pluëia ne à per fertuna nia durà giut y nscila ons cun gheneda ënghe pudù purvé a nes “abseilen”. Ruvei inò japé fovl mo abenëura y perchël sons mo jic tla Zità dai Sasc a purvé a fé “stonc”.

La dumënia nes ons pona ancuntà dala furnadoia de Col Raiser. A to ora i flucions ora di auti fajovl bel n trei gótes – udëi tan lonc che ruvon?!? Su cun la furnadoia y po a pé nfina sota la Pitla Fermeda. L se trajova ite y ora, ma cun la segurëzza de avëi n Mëinacrëp daujin ti l ons vagheda: 2 cordates su per i “ciamins” (ulache ie fove ënghe leprò) y doi cordates a fé la “Jan” – doi beliscima vies!

Suvier al marë lascià fé, iusta n 5 menuc de pluëia, ma ne son pu nia de zucher! Sun piza ons monc ciafià a maië l panino. Canche fan per pie ju – tan ciaut ne fovl mpo nia, da pudëi sté scialdi giut – udans coche chëi dl autra via ruvova sun l “Vorgipfl”.

Nëus son po piëi ju y canche fan japé al scumencià a pujiné. On cialà su – i autri ne fova pa nianca tan dalonc… “Snel, mucion dan che la vën dassën” nes on mpensà y snel piëi inant. Dan ruvé jù da Pieralongia al po danz scumencià a jeté che do 5 menuc fan moi nfin dala brea da dessot!

An fat ora de nes ancunté dal Troier, ma ajache l jetova a na tel maniëra ons tëut la dezijion de jì de viëres dla furnadoia y tlamé da Odles. Ti on mandà n SMS ai autri y po snel inant!!! Ruvei da Odles – moi sciche ora de doccia – nes on bù velch de ciaut. I autri ne fova do n pez mo for nia da spië, nscila i ons cherdei su. Ëi ie mpomo mucei via dal Troier a sosta – la hutia fova plu daujin.

Ajache fan duc feter dlacei sëura ons fat ora che uni grupa va ju per si cont, acioche deguni ne ebe drëde aspité sun i autri y dlacé mo de plu.

Davia che ne ei nia abù l’ucajion de saludé duc, ulëssi nscila rengrazië duc chëi che à fat pea l curs, speran che l ti à sapù bel – ënghe sce nes on giatà la jeta – y che i à pudù mparé truëp.

Flavio y Lucas ulëssi rengrazië che i se à tëut dlaurela per nëus y che i nes ie stac daujin y nes à mustrà tan ngrum te chisc dis!

Speran de udëi un o l auter su per nosta bela pizes,

ve saluda

Barbara

18 mandli te 4 auti plëns nfina sao tët ie n vënderdi, 25 de merz piei via bel abenëura (dala 6) de vieres de Peio tla Val di Sole. L fova n beliscimo di y duc fova de bona ueia!

Cun l aiut dla furnadoia ons danz fat saurì i prim 1400m de deslivel Dala stazion a mont dla furnadoia on pona mo messù furné juvier cui schi n 150 m dan mëter su la peves.

N udova bel la piza dl Vioz y la tëmpla bela ërta che messan fé per ruvé su – nia per chëi che ie frec de fé Spitzkehrern! L fova na bela tòla, da jì saurì, me l ultimo tòch on messù mëter su i Harscheisen. L nuef Rif. Mantova ons lascià a nosta man drëta y son nscila reisc ruvei da 2.800 m a 3.645 m, l’autëzza dla piza dl Vioz. Ilò on pudù nes goder l surëdl bon ciaut y l bel panorama. Tlér udoven it l Sasplat y la Marmolada a Nord-Ost, a Sud de nëus la Presanella, l Adamello y la Punta S. Matteo, a Nord l Similaun, la Weißkugel, l Palon de la Mare y la Königspitze!

Ajache la previjion dl tëmp dla dumënia ne fova nia massa bona ons messù mudé n puech l program: mpede jì 3 dis, son me jic 2 dis, fajan te un n dì l Vioz y l Palon de la Mare.

Nscila ons tëut sgors do ju ju dl Vioz per ruvé plu saurì ora per n plan. Pona on inò metù su la peves sun i schi: mo n trëi Spitzkehren ertes da fé, dan messei tré ora i schi y i purté n pitl tòch, davia che l fova da jì danter tei sac ora, pona inò tré seura i schi y jì mo ite per n tel pitl plan y su l ultimo punton (per fertuna nia lonch!) per ruvé sun piza dl Palon de la Mare a 3.703 m de autëzza.

Do avëi fat plu o manco 1.200 m de deslivel stajan for sëura i 3000m, sentiva n valguni bën n puech l autëzza, ma ënghe i autri fova cuntënc de pie ju de vieres dl Rif. Branca (2.487 m). Sciot che la nëif ne fova nia massa bela: na grosta buieda y plu tert na fetra melma da messëi druché ora – nes fajova pa feter la gola chëi visavis de nëus che fajova tel bela raides jù per n Nordhang da polver… Pu eh, dut ne pona avëi y la bona uëia nes on ënghe perchël nia lascià to!

Ruvei pra hutia son mo stai dan porta a surëdl nfina che l dajova y po mo ite dedite, velch a carté y velch a sla ciaculé. Da mesa la 7 dajovel da cëina – duc ne aspitova l’ëura, che la fam fova granda! Y po cie cëina che on giatà: N iede uni sort de affettato, po na boniscima pasta bel al dente y dopro mo Lachsforelle cun patac y salata! Daldò mo n pue sla cunté o sla carté y po via y ite tl liet.

L di do, do avëi maià da gusté sons piei via puech do la 7 daduman, ite per n tel plan mpò n pue lonch, do a ngrum de Spuren – chëi che udan l di dant furnan juvier

La piova pona bën bel plan suvier, passan via a n serracco bendebo potente y po su per passé via la Schlüsselstelle – i primes à metù via na corda per pudëi n pue se tenì. Ruvei sëura ite ne manciova nia plu scialdi nfina sun piza dla Punta S. Matteo a 3.678 m. On abù scialdi fertuna, che on mo udù ora scialdi bel y permò canche fan per pie juvier, inò de vieres de Peio, scumenciova a tré ite da Nord l nibl.

Son via y jù do ala cresta. Ruvei pra l bivacco Meneghello on udù che la jiva bendebo ërt ju danter tei crzuëi ora. Bel plan son sbriscei jù y chi che ulova univa ënghe tacà – na pitla avventura messova bën mo vester te chisc 2 dis! Duc sl à caveda bendebo bën y nscila ne fovl nia tan grave che plu insù fossla ënghe jita plu saurì Son jic inant ju per na bela tòla sciaudeda nfina dala stoa Lago di Pian Palù. Puech dessot an n auto. Nscila ons pudù furné nfina a Peio, ulache son mo tlamei a se maië zeche de bon.

Doi dis scialdi garatei, ulache DUC à giatà n bel culëur tl mus

Rengrazion de cuer chëi dl GAG che nes à judà a mené chësta jita y ie rengrazi per la bona tëurta che ei giatà per mi cumplì di ani!!!

Ve saluda y ala proscima

Barbara

N beliscimo temp, feter degun vent, temperatura coche la toca da vester, tan che degun pericul de levines.

Piei via daduman bel abeneura cun la curiera y… zack … sun l’autostreda daujin da Persenon se fermela!! Nia plu mesun de la fe pie via. Messè cherdè su n mehanicher, nia! Messè cherdè su n autra curiera, bendebo de tribulazions a tò ora duc i schi y flucions da una curriera per la meter it te l autra (messé stlu na corsia de l’autostreda).

Dulzis in fundo ons tra via belau 1 eura y mesa y perchel se ne ons nia plu nfidà a ji sun la Kleine Gaisl. On calculà che fassan permò ruei sun piza danter la 2 y la 3 domesdi, massa tert per la segureza de neus duc per via de la tempratures autes, perchel ons pensá de mudé mpue program y son jic sul Großen Jaufen (che ie iló dlongia) y po dò ju passan per la Rossalm y ju a Altprags.

Mpò sta scialdi bel y ala fin a mpò dut butà.

Ugo
per la Lia da Mont

Cun la pitla curiera belau plëina – fan de 23 – sons pona piei dala 7 daduman de vieres de Ridnaun. La ueia fova bona, davia che l ova i dis dant nevët…
Ruvei ntëur la 9 pra la cësa di Destudafuech, nes à la curiera lascià ora: 1100 m de deslivel fova dan nëus. Nes on njenià ca y son pona muec do avëi fat la proa dl pipser: Bel mponta su, su per l bòsch. Theo jiva de bon var danora y duc jiva do drët da snait!

Ruvei ora dl bòsch pra la Untere Gewingesalm nes on fermà l prim iede per bever: N udova bel tei che ruova sun piza, ma da chël ne on pa nia giatà prescia – massa bel fova cie che n udova dut nteurvia!

Paussei ora son pona jic inant nfin sun cresta – la prima “Spitzkehren” fova da fé, ma cun n valguna spiegazions ie duc stai boni dles fé. Passei via la Innere Gewingesalm jivla po mo inant, ite per n tel plan. Japé dl ultimo punton dan la piza nes on pona mo n iede fermà. Do avëi paussà ie i primes muec, y i ultimi cialova su (n pue sla rijan) a tl cajin che fova su per tl tòch ërt y strënt dla cresta: Semiova n furmiè… Do 2 ëura y mesa y do avëi fat trainieren l fé “Spitzkehren” – nen on propi messù fé ngrum! – ie duc ruvei drët cuntënc sun piza. Chël ne ie nia da se fé marueia, da n tel bel tëmp y mo nët nia frëit…

Ma l plu bel ova pa mo da unì: l furné juvier! N beliscimo polver nfin belau dai snodli ca. Cie se mbincien pa deplù?!? La fadies dl jì suvier fova dutes desmincedes!!!
Sën manciova me mo na bona merënda per paré la fam – l fova bel n pue do la un domesdi – y chëla ons ënghe giatà dal Schneeberg.

Stanc, ma cuntënc sons pona inò furnei de revieres te Gherdëina…

… y per chi che ëssa giatà la gola – l proscimo iede ëis me drëde unì pea

ve saluda, Barbara

Udú dant fovl de ji sun l’Altissimo sun l’Altipiano del Brentonico, che fesc pert dl Monte Baldo, ma per via de ciarestia de neif ons spustà la jita.

Phillip a sapú da cri ora dret na bela alternativa, na jita saurida adateda a duc.

Ruei tl pitl luech de Proveis tl „Deutschnonstal“ se on ferma a tò l café, la curiera nes a inò mena n toch de reviers per nes lascé ora ulache
nscumenciova nosta jita. Canch fan duc anjnei, son muec per na streda forestela per rué do presciapuech n eura pra la „Stierbergalm“. Tlo se ons fermà n mument, l gran ciaut nes ova fa giaté na gran seit, son jic inant suvier y daldò it per na valeda. La neif fova bel n mument scaudeda su y n valguni ova da ciapí cun i tachetti sota ai schi. Ala fin dla valeda fovel mo n toch n mument plu ert per fe n valguna „Spitzkehren“.

Do n 3 eura fans duc sun piza, ulache messan ste strenc, scenó assan danz nia abú lerch duc. Tlo se ons fermá mpué per se goder l bel panorama, maië y bever velch ora de flucion. Sen fovl inó eura de pié ju, Monika ie mueta danora a fe streda, l prim toch fova dassen furnà ora, davia che chesta ie na piza dassen praticheda. Son inò furnei de reviers da ulach son sú.

Ruei ju pra l luech da paur, npue sëura de ulache fan muec, son jic a pé do n troi per rué pra la ustaria ulache nes aspitova velch de bon da maië y sambenzenza n „Weizen“ bel fresch dassen merità.

L ie sta na belliscima jita cun n temp de marueia.

De gra a duc chei che ie unic pea y al proscimo iede ve saluda per la Lia da Mont
Brigitte

Cater jeuni a teut pert a chesc curs. N sada domesdi se on urtà tl local di Judacrëp ulache Othmar nes a spiegà a puntin cie che toca dut te flucion canche n va a fe na tour. Daldò nes al spiegà mpue de zech sun la metererologia, la neif y si cristai y la levines. El nes a enghe nsenià a liejer na cherta y de coche n cherd aiut. Fina via chesc domesdi, passà dassen ajlun, se ons urtà l dí do daduman japé dla stazion de Col Raiser.

On fa n valguna proves cun pipsri desferenc y on nparà ai cunescer plu avisa, strumenc dassen de npurtanza per chesta attività. Furnei it de viers dle utia de Ncisles, ulache tosc do ons metu su la peves y son jic ilt per chi „plans de Ncisles“, ti on ciala a na levina unida ju n valgun dis dant per capí deplú sun la teoria dl dí dant. Jian su per la sciorta dla Roa ons mparà a fe „Spitzkehren“ coche l se toca, saisom se ons fermà a maie velch de bon ora de flucion y a se goder l bel panorama. Se on ino trat seura i schi y son furnei ora de viers de Pieralongia, ulache Othmar a giavá n busc lta neif, per nes mustre la desferenza dla temperetura dla neif y a nes fe udei y cristai de neif. Ala fin ons mo purvà a
sondieren y a giavé.

Rengrazion de cuer Othmar per l curs dassen istruttiv che l nes a tení.

Per la Lia da Mont ve saluda Brigitte.

Dendut fans de 27 persones y son furnei cun la curiera a Al Plan (S.Vigil) y inant per la Val Dai Tamersc per rué a Pederü (1.548 m).

Iló sons piei via a pe su per la Val de Fanes per rué sala hitia Lavarella (2.042 m) ulache se on fermà. L temp foa scialdi bel y i lec de Lavarella stramudoa ti plu biei culeures, dal vert al brum. Ngrum à nuzà l‘ucajion per fe pultrec y amiré la geologia nteurvia che à ziplà formes de marueia.

Inant iesen po’ jic su per i Plans Dles Sarenes per arjonjer l Jeuf De Sant Anton (2.466 m) y inant sun Piz De Sant Anton a 2.655 m. Da chesta piza an propi n dre bel udeiora dala Zillertaleralpen via ala Drei Zinnen, la Tofanes, la grupa de Fanes, n toch dla Marmolada, Piz Boé y Putia per n cunte su me n valgunes.

Do avei cialà la bela montes sons po piei ju per la Val De Fanes y son ruei ju a Cians (1.471 m) n blot luech de La Val. Tla dlieja de S.Berbora an mo ciantà na lauda ala Madona y po sons jic tl Survisc Hof, ulache on duc pedù ciarcé tutres fates fresces al mument cun spinot y pavé. Otto à teut la chitarra tla mans y nes à sunà de bela melodies da cianté pea.

Do chesta bela pitla festa sons furnei de revieres te Gherdeina ulache nes on saludà.

De gra a Roman y Antonella che nes à menà y nes à cunta sù de nteresantes y teles darì.

Manuel

N valguna fotos dla jita …

La tour veigh dant l prim dì de jì dal Rifugio Lunelli su per la ferata Roghel y pona ju per la cengia gabriela nchina al Rifugio Carducci, ulache n passa la nuet per pona muever l dì do de viers dla Via degli Alpini pona su sul Passo della Sentinella y inò de reviers al RifugioLunelli.

Chesc dut amesa y crepes ite cun n panorama da marueia y troies scialdì manco trafichei de chei nteur ala 3 Zinnen.

Pion via bel abeneuera daduman cun 2 pulmini da Sëlva demez per ruvé puech dan la 9 a Pàdola pra l Rifugio Lunelli, ulache tlamon mo a gusté.

L temp ie segur, l ciel brun, l ie bon ciaut: urton dessegur y dis plu biei nchina mo de agost.

Do ca. 2 eura ruvon pra la ferata, ulache se trajon ëura la massaria da ferata (Klettergurt y casco) y un n dò l auter pions su per la ferata Roghel. Chesta ne ie nia longia, ma la se damanà mpò mpue de forza di braces y segurezza sui piesc. Plu lonch ie daldó la „streda“ per ruvé al rifugio, for su y ju y dut ntëur a mesa y crëpes it, a toc for inò cordes ulache n possa (o muessa) se tenì. ntuer la 1 se fermons a maië ora de flucion y a paussé, ma savan che se aspieta mpò mo mpue de toch, vala riesc baiter. 

Ntëur la 5 ruvons pra hitia cun na dreta sëit y se gudon mo l suredl y l bon ciaut dan hitia.

L ost Beppe Monti nes aspitova bel ert. L ova n dre not per via dla festa che fova l dì dò y l ne ova perchel nia gran dlaurela de ciaculé, ma l se mpermet na sorpreja do cëina. Do na bona cëina veniel fat scur y l ost mostra na diashow dret nteressanta cun fotografies che el à fat ntan duc i iedesc che el ie stat tla regions dl Himalaya (ël ie stat tralauter per 3 ani tla Piramide ai piesc dl Everest). 

Davia che l segondo dí ie enghe mo do la rata lonch, ne pudons nia se fermé per la festa pra hitia y pion via da la 8 de viers dla Via degli Alpnini. La nëif che fova mo dan n mens se n ie gran pert jita y l ne ie degun problem a passé.

Zeruch „tl vert“ messans vester tan che ruvei, ma l troi semea ne ulei nia plu finé. Fajon na pitla pause pra lech, ulache se sferdon ju mpue i piesc. Chest’iede se fermons al Rifugio Berti  y se gudon n pier bel freit dessegur merità.

De reveirs furnons per Auronzo, passan per Cortina, Falzarego y tlamon mo a Corvara a maië na pizza y fe na viva ala jita dret garateda.

N sada ie na grupa dla Lia da Mont pieda via de viers dl Austria per ji sul Piz Buin. Son passei sul Brenner tres l Wipptal nfin a Dispruch, po inant tres l Inntal nfin a Landeck passan per l Patznauntal arjunjan la Bielerhöhe, che ie l pont plu aut dla streda dla Silvrettahochalpen. L viac ie stat na na bela ntraunida, y nianca do la tampesta a Dispruch y l gran temporal a Galtür ne se à la grupa lascià demotivé.

A pé son piei via de vieres dla Wiesbadenerhütte a 2.443 m adurvan manco de doi eura sota vel gota de plueia. Do avei giatà la majon y avei cënà dret bon ons mo rujnà dl dlacier dl Piz Buin y pra n bon got ons mo cuntà teles da rì passan na bela sëira.

N dumenia sons po bel levei dala 5 daduman a gusté ma l temp ne fova nia dre bel, y perchel an teut la dezijion da aspité. L nibl ne uloa propi nia sen ji y purtruep ons messé dejdi la piza: massa stletes la condizions.

Nteur la 10 sons po muec a fe na jita passan per l Radsattel (2.652 m) y l Radsee ulache on maià da pan dala nuef per arjonjer inò la Bielerhöhe.

L ie stat na bela jita ma l ie enghe restá mpue de sëur antia tla bocia, pervia che n ne à nia pudù arpizè l Piz Buin.

Manuel

L fova mpue ciaut fina che son ruei ora dl bosch (y ora de i barantli), daldò fovl na tel pitla bela aria che se à judà a rué sun piza!

Do vester passei per l Serlesjöchl ons fat la traverseda de viers de l Stubeitl tlaman mo mpue tla hitia de Wildeben ulà che se l on mo lasceda jì mpue bona…

Saluc dai 3 che à metù a jì la jita
Sybille, Brigitte y Ugo

Su muec da Urtijëi nteur la 7 daduman per furné de viers de Rovereto, da ulache son furnei it a manciancia per rué tl pitl luech de Anghebini. Se on fermà a tò n bon cafe, ulache l ost nes aspitova bel per nes acumpanie n toch te chesta jita.

Son jic per n 3 ëura tres l bosch da fueia, chesta valeda se tlama „Valle dei Foxi“. L ie n troi che va a serpentina, nia ert, per rue su sun l jëuf tlamà Bochetta dei Foxi.

Da ilò son jic per na pitla mesëura de viers dl Corno Battisti, ulache Ezio, l’ost che nes à acumpanià, nes à cuntà velch dla sotria de Cesare Battisti. Te chesc crëp y dlonch nteruvia iel ngrum de cavernes y postazion dal Gran Viera da udei. Ilò se on pona enghe fermà per maie da marenda ora de flucion y se goder l bel panorama.

Jic de reviers nchina pra la Bochetta dei Fori, per ji inant sul l Monte Testo, ualche on pudù vijité la postazions dla Gran Ciera dassen nteressantes.

Da iló son pona jic juver per na pitla cher d’eura per rué pra la utia Lancia, ulache on pudù maie velche de ciaut.

Do n ëura de paussa son s jic de viers de Giazzero, ualche nes apitova la curiera, passan per de biei prei verc cun de blotiscima pitla cëses de sas.

A chesta  jita a teut pert 14 personen , a cheles che ti à sapú dret nteressant y bel.

De gra de vester unic pea!

Birigtte y Monika

Bele ai 3 de juni dala 8 da sëira nes ons ancuntà cun l meinacrëp David tla palestra da jì a crëp sun la plaza Nives te Sëlva per fe na sëira de teoria. Fan de 4 che à fat pea l curs. Ilò tla palestra nes à David spiegà la cosses plu mpurtantes per l jì a crëp y nes à lascià purvé i gropes che n adrova. On ënghe purvà a fé n “Stond”.

N sada, 5 de juni – n beliscimo di zënza na nibla – nes ons pona ancuntà dala 9 daduman te Sëlva per furné deberieda sun l Jëuf de Sela. L danmesdi sons stac tla Zità dai Sasc, ulache on pudù purvé a fé “Stonc”, mëter ite Friends, Klemmkeile y ciodi tl crëp. N plu ons ënghe mparà coche n se lascia jù a na maniera segura. Domesdi sons pona mo jic a fé la via “Freccia” sun l Prim Sellaturm, ulache on pudù purvé ora per l prim iede la teoria che on mparà.

N dumënia sons muec de viëres dl Falzarego. Ilò ons pona cialà, ciuna via che pitova la mieura condizions. On nscila crì ora na via sun la Torre Piccola di Falzarego. Jian un al iede danora y cun i cunsëies de David sons ruvei sun piza. Do che nes on lascià ju per la corda ons udù che l fova mo abenëura. Nscila ons mo fat na via ilò dlongia sun la Torre Grande di Falzarego. Stanc ma cuntënc sons ruvei pra auto che l scumenciova a guté – iusta mo fata!

Rengrazi David che nes à mustrà ngrum de roba mpurtanta per l jì a crëp!

Barbara

pra la hutia de Resciesa iesen ruvei su pra tët…

Se on fermà a Pietramurata, da ulache son po piei su per la via fereda „Che Guevara“ sun l Monte Casale, de ndut belau 1.400 m de deslivel, 600 de chisc me de crëp nfrà su cun cordes de acel y unitant nce cun n valguna cramples.

Sambenzënza se ons duc 11 trat sëura l „Klettergurt“ cun cordino y carabineri, y l casco per ji segures su per chësc bel parëi.

Ruei sainsom fovel n bel pra vërt cun la jnofies y autri ciofes che fluriva; dovia udoven la pizes bela blances de neif dl Caré Alto tla grupa dl Adamello y duta la majra pizes dla grupa dl Brenta.

De reviers sons po jic do ju verso nord, scialdi tres bosch da fueia ruan a Sarche ulache l sciafer dla pitla curiera ie unit a nes to.

Do avei mo maià na bona pizza sons po furnei inó de vieres de cësa duc cuntënc de avei fat chësta bela jita cun l tëmp bëndebo bel, me datrai n puech da vënt ma chesc ne à nia desturbà plu de n tant.

Arthur

I 3 dis cula peves ala fin de auril ie for n jita dret aspiteda. Riesc se ova scrit su  15 persones nteressedes. Mirco ova n dre not a cherdé su damandé y se cunsulté cun Adam davia che la condizions tl luech cris ora ne semiova nia la mieures. Nchin ala fin fovel mel segur sce n fossa furnei dl Svizra o essa cris n post alternativ, ma ala fin ie stat teuta la decijon de furné coche da program tl raion dl Bernina.

L venerdì sons pona piei via cun 2 pulmini da la 4 daduman de viers de S. Moriz. I doi mëinacrëp Lucas y Flavio nes à acumpanià.

Do vester tlami a gusté a Silvaplana, che ie a 5 menuc da S. Moritz, ons teut la furnadoia per ruvé sul pass Corvatsch. Da iló sons pona furnei ju nchina ala hutia da mont Coaz (2.610 m) ulache on durmì i 2 dis.
L temp ne fova nia massa bon, l fova asnibla y a toc mpue da nibl. Ma n ciafiova mpò a ji n toch. Perchel ons lasciá ju chel che ne adurvan nia per smendrì mpue l peis dl flucion y son piei via de viers dl Piz Sella (3.564 m), che on arjont do n 2 ëura. La condizions da furné ju fova pon mieures che ne pensan, ma l fova mpue da meter averda, davia che l fova ben de gletscherspalten y n ne les udova nia for tan ben.

Zeruch pra hutia se ons maia velch de ciaut y l ost nes á fat udëi la majon. L ost ova pensá de se meter duc te na sëula majon y perchel stajans dret strenc . L ost ne fova nia dre da plajei, ma la 2 mutans che laurova dret da druch y da ulëi bon. Na bona cëina y na blota sëira nes aspitova.

La previjions dl temp per la sada ne semiova nia la mierures, aldò dla nforamzion tacheda ora pra hutia. Flavio y Lucas se ova perchel studià ora deplu alternatives per i proscimi 2 dis.

La sada sons levei, che l fova da nibl y ajache n ne fova nia boni de capì sce l temp se essa trat ora riesc, ie stata teuta la decijon de fe la tour plu curta sul la piza Glüschaint (3.594 m). L nibel se à tosc trat su y la nibles fajova lerch al suredl. Flavio jiva danora cun n ritmo adatá a duc. Puech sota piza se ons trat sëura i grifs, davia che l fova n toch bendebo ert da ji a pé, dan passé via n grat per ruvé sun piza. Lucas ie jit danora y a metù ju na corda, per chiche ti savova plu saurì a se tenì.

Via per l grat se ons pona spartí su te 2 cordates. Ntant fovel unì completamenter sarëin y l fova bendebo ciaut, belau massa.

Do se avëi cialá ju l bel panorama da cassú y maia velch ons fat lerch sun piza per chiche univa do. Ulan ënghe mo urté de bona conidzions per funé ju. Y nscila iela ënghe stata.

Pra hitia fans i primes y se on nscila fat lerc su la teras, se on maiá velch y se on godú l suredl y la temperatures belau coche d’instá a chela autezes.

La dumënia pona sons level abeneura per pie via cun duta la massaria da la 6 daduman. Nosc traviert fova la piza Morterasch a 3.751 m. L fova belau mo scur canche son furnei cui schi dl viers dla Val Roseg per se ferme a zirca. 2.100 metri. Da ilò son se ons pona metù la peves per pie it per la val . It inson pon averso man ciancia per ruvé pra n pitl plan, dan pie su a man dreta de veirs dla piza. L temp fova bon, enghe sce l fova nia sarëin dl dut. Propi puech dan ruve sun piza se á trat it n nibl y nscila ne an nia n gran panorama sainson. Me 50 metetri sota piza udoven inò scialdi deplu. Davai chel l fova scialdí ciaut ne ulans nia se fermé giut. Son pona furnei de reveris nchin tl plan per meter mo n iëde su la peves per n 200 metri. La condizions dla neif fova dret bones. Da polver a tola ons urtá dut. Mo niëde a pe su per n toch mpue ert per pona furné ora per la valeda, passan pra la hutia Boval. Davia che l fova tan ciaut deventova l nëif for plu freda y n arsiva bendebo it, ma on ciafiá a ruvé ora inson cui schi sëura.

A Morteratsch à Flavio y Mirco tuet la ferata verso Pontresina per ruvé de reviers a St. Moritz a to i pulmini. Nëus on ntant aspitá ala stazion del ferata. Sciot che l ustaria fova zareda. Assan pa abù na drëta sëit!

Ntëur la 5 se on pona nstradá de viers de Gheredëina. Son mo tlamei a Marling a se maie na pizza, davia che an duc na dreta fam. Da la 11 fans inò zeruch te Gherdëina.

Lie stat n blot fin dl ena y te 3 dis ons ciafià a fe 3 pizes. La se à butà cul temp y cun la condizions. Duc á arjont si travierc y rate che a duc ti ebe sapu dret bel. Y l plu mpurtant, son duc ruvei de reviers san y ntonn.

De Gra a Mirco per l organisazion y a Lucas y Flavio per nes avëi mená chisc 3 disc.

L temp y la condizions permetova n bel fin dl ena y duc fova dret motivei.

Cun na blota grupa de 12 son piei via n sada da la 5.15 daduman per furnè nchina Schlining, it insom la Vinschgau. Da ilò sons piei via cula peves de viers dla hutia Sesvenna a 2.256 m, ulache se on bù velch y lasciá ju mpue de zech per smendrí l peis dl flucion. 

Son pona piei su baiter de viers dl Piz Rasass a 2.941 m, che on arjont puech dan mesdì. A toc fovela mpue buieda y n valguni à metù su i harscheisen per fe mpue plu saurì. L temp fova bon y sun piza fovel dret bon ciaut y nia da vënt. Nscila ons pudú se goder la piza (n chel dì fans y primes a ruvé su) y l bel panorama de crëpes a 360° che n à da cassú.

Na bela tola nes aspitova pona a furné de reviers dl hutia.

L ost nes ova tenì na zimra per nosta grupa. La hutia fova tan che plëina y nchin da cëina se ova abinà adum ngrum de jënt.

Da sëira fovel dret da vënt y l fova bendebo freit. La previjions dl temp per la dumënia ne fova però nia tan stletes.

L dì do daduman sons levei che l fova bendebo lasciá ju. De nuët ovel ënghe mpue nevet. Se on pona lascià mpue dlaurela a levé y gusté. Ntant ova l vënt ciaciá la nibles y l semiova mpò mo che la butessa cun la piza. Piei via sons che l nevova for mo mpuech, ma l temp se metova da bel y nchin sun piza se ovel trat ora y la nibles ova fat lerch al suredl.

N á teut la decijon de lascé i schi puech sota piza, per ji su a pé su per l grat. Philipp y Manuel ova tëut pea na corda da seguré chiche se ne sentiva nia dre segur. Sun piza fovel bel, ma plutosc freit. Perchel ne se ons nia fermá giut.

De n valugni ons tëut su i schi nchin sun piza y son pona piei cui schi da piza ju. Y ajache l fova tan n bel polver,  se ons mo n iede teut la brida de meter su la peves y jì mo de reviers l toch plu bel.

Ntan fova ruvei ju ënghe chei che fova a pe l prim toch y deberieda sons furnei baiter. Ulan fe na variante a furné ju a Schlinig, che essa udù dant n bel parëi da tola, ma davia che per ruvé sun l schorta dan pie ju fovel scialdi ert y ngrum de nëif frescia, se stentans a ruvé baiter. Perchel ie unida tëuta la decijion de furné ju per la „tlassica“ che passa pra hutia, per pona furné baiter nchin ju pra auto. 

Daldó sons mo jic duc deberieda a se maie velch a Glurns, per furné pona de reviers te Gherdëina.

De gra a chei che a metù a jì y menà chesta jita.

Davia che la condizions per fe jites ne ie chest’ann nia dla miëures, ne ons nia pudù ji, coche pensà, a fe la Ellespitze te Pflersch. Coche alternativa ons cris ora la Lorenzispitze da Lastzfons su, rateda na piza bendebo segura ënghe cun stleta condizions.

Cun temperatures drët bases (-10° a pie via) sons piei via dal post dai auti Steineben (ulache ruva ju la pista da la lueses), per jì su per i preies de Kompatsch ruvan nchin da la Klausner Hütte, ulache se on fermá per bever zech y nes sciaudé mpue cul tè fiers.

Da iló peien pona bendebo ndret su, per tenì pona la man drëta y ala fin inò verso man ciancia per ruvé te na serpentina sun n pitla sela, puech sota piza. Mo n iede de viers de man drëta per i ultimi 100 metri.   

Do 2 ëura fova duc sun piza y l tëmp la minova ben cun nëus. L à lascià dò mpue l vënt y on ciafià a ste n pèz sun piza a se cialé ju l bel panorama de 360° de crëpes che n á da chesta piza.

Juvier son furnei l prim toch bendebo ndret ju, per tenì pona la man drëta, furné ju n toch per l bosch y ruvé inò ti preies de Kompatsch y ju d ereveirs sula plaza di auti.

Davia che l ova bendebo buiá y l fova massa freit per la sajon, ne al nia ciafià a deventé „firn“, ma purempò ne fova la condizions nia tan stletes a furné ju.

Son pona mo tlamei dala hutia Steineben per na bona marenda y per na viva che dut à butà.

Cun na curiëra da 25 posc’ sons muec dala 7.15 da Sëlva demez per furné de vieres di Gospeneid Höfe sëura l Jaufental. Do avëi fat na pitla cafepause y do avëi messù meter su la ciadeines me puec metri dan i luesc da pauer per via dla nëif buieda, sons muec dala 9.45 cun i sci (normal mëtun pa me ca. 1 ëura y 15 menuc da S. Cristina a Gospeneid!).

Do la streda forestela tres l bosch fovl bel n pue da vënt, nscila pudans bel nes nmaginé cieche nes aspieta canche ruvon ora dl bosch! Bel plan son su, do ala valeda, l nibl trajova ite y ora. Do n pue passa n ëura ons paussà, ma nia massa giut per via dl vënt frëit. Mo n pitl tòch sons pona jic inant, fan puech sota l tòch plu ert dan la sciorta. Ilò al pona moncmo scumencià a nevëi y on tëut la dezijion de de ëuta.

Juvier ons urtà na beliscima nëif frescia, duc sl à gududa y se à prësc desmincià che ne son nia ruvei sun piza. Ne son nia de revieres a Gospeneid, ma son mo jù n tòch de vieres dl Wiesel Hof, y jù nfina a Außenthal tl Jaufental.

Barbara

Son muec de 11 da la 8 daduman a Urtijëi per furné a Pergine tla Valsugana, ulache son mo cherdei a tò l cafe.

Do chël sons po furnei inant tla val dei Mocheni nchina Palú, da tlo inant a pe passan da vel ciajea y po onsa tosc trat sëura la ciaspes per ji de vieres de passo Palú y po inant per cresta, dl prim drët ërta, sun cima Palú, tlo buiovla a strufes tant che ne son nia stac giut sun piza, ma son piei ju per Pleza Bella per rué de n auter vieres inó a Palú ulache an i auti.

L ie stat na bela jita cun n drët bel udei ora, n valguni fova l prim iede cun la ciaspes y ti à sapú na beliscima esperienza; la neif fova dut n bel polver.

Arthur

L se à scrit it 8 persones.

Flavio à cris ora l bel raion de Prags per mustré, nia me co ti jì permez a chesc sport, ma samben ënghe i periculi che n va ncontra y coche n possa purvé a ti vester.

L prim dì, dò che n à mparà mpue de teoria, coche n afronta na piza y la tecnica de fe „Spitzkehren“, sons jic sun l Dürrenstein. Domesdì ons mo fat proves cun l piepser.

Daseira se l ons mpue ciaculeda ntan che Flavio nes à  spiegà  mpue i periculi che n va ncontra pratican chesc sport, dantaldut chel che reverda la levines.

L segondo dì ons fat na jita da l’autra pert dla valeda y plu avisa sun la Kleine Jaufenspitze.

De gra a Flavio per chisc 2 dis dret nteressanc.

Ugo
per la Lia da Mont

L ie states fates doi grupes per spartì su chei che sa bel da adurvé l piepser y chei che ne à mo deguna esperienza. Dieter à spiegà y mustrà a chei che ne sa mo nia co adurvé l piepser coche l funzioneia y ciche ie dut da savëi. Uni un à pona pudú purvé nstessa a ji a crì n piepser nascundù nzaul tla neif.

 Per chei che á bel fat vel proa ië Hubert jit it mpue plu avisa tla materia, dajan vel cunsëi y drëta sun coche n à da se cumpurté canche l ie deplu persones sota na levina, cohe l ie da adurvé sonda y pela y sun ciche l ie da meter averda canche l ie plu persones che va a crì i melcapitei. 

N spera de ne ruve mei te tel situazion, ma purempò ie per duc chei che va cula peves o ciaspes mpurtant savëi ce fe n cajo de levina y perchel dret che l ven for inò recurdà y pruà co se cumpurté.

De gra a Hubert y Dieter per chesta sëira de nformazion.